بقلم :علاء سليم آمين عام الاتحاد العام للمصريين بالخارج

الناس فاضية وقاعده ع الميديا وهات يا رغي وهات ياكلام عن المصريين في الخارج .. يعني لما فئه مندسه وسط الشرفا عملوا فيديو يسيئ للمصريين في الخارج .. يبقى الكل وحش ؟ .لما يطلع علينا مجرم ويتكلم عن الأكل ويرجع يعتذر .. او مجرمه تجيب سيرة مصر في الاوضه بكل جرأه مش خايفه امرها ينفضح وتنكسر .. يبقى الكل وحش ؟ . طيب ودول احنا عنهم تايهين ؟ .. وعن توجهاتهم احنا مش فاهمين ؟ دول عندنا معروفين ومهزئين .. وصفحاتهم بتقول انهم سوابق ارهابيين .احنا اللي بندافع عن الوطن لما الخونه بيشتموا .. واللي بنروج للسياحه لما السياح يغيبوا ويهجروا ..احنا اللي بنقول ان مصر اتغيرت .. ولما نشوف الغريب نقوله مصر بقدومك نورت .الزم حدودك انت وهو وهي واختشي وعيب عليك .. احنا جزء من المنظومه من الشعب اللي بيشارك في الفرح والهم والخصومه .. احنا في الغربه كبار ونجمنا عالي .. احنا حراس الوطن اللي دايما في الشدة رافعين علمه لانه غالي .. احنا بنشرف بلدنا ونرفع علمها .. احنا الاساتذه والعلما والنوابغ والمهندسين والقضاه والاطباء والمحاسبين والمعلمين اللي بيخدموا البشرية في كل انحاء العالم .. احنا بتوع التعمير والصناعة والزراعه والمعمار والورش والفلاحه والشطاره .. احنا دافعين الرسوم والضرايب وتصاريح السفر .. احنا زباين مصر للطيران اللي بنركبها مع ان البديل ارخص .. احنا المصريين في الخارج اللي لو دم الوطن سال الكل يتبرع لها لحد ما دمه يخلص .الزم حدودك لما تتكلم عن المصريين في الخارج عن السفراء فوق العادة عن السيف اللي بيدافع عن مصر في المنظمات الدوليه والاحتجاجات والمؤتمرات والوقفات والمناسبات القومية .. الزم حدودك وافهم ان المصريين في الخارج درع مصر الواقي واللي سيفه دايما نار ، وعلى كل ارهابي وظالم .. بتّار .وان مفهمتش يبقى ناقصك كتير لازم تعرفه عن اهلك وناسك اللي سافروا واتغربوا .. وتعبوا وشقيوا ومالهمش غير رب العباد حليم ستار .

هذا المقال بمناسبة اتهام البعض من رواد السوشيال ميديا وبعض البرامج التليفزيونية ان اخلاق 12مليون مصري في الخارج هي نفس اخلاق صاحب فيديو السندويتش وصاحبة فيديو الغرفه في فندق ماريوت .. وليس كلامي موجهاً للعموم.